علمي سيمينار: د استاذ انفرادي دوسيې او راپورونو جوړول او ترتيب.
نېټه: ۰۷ / ۱۲ / ۱۴۰۳ ورځ: سه شنبه
د مستقبل پوهنتون د کیفیت د تضمین آمریت د استاذ د انفرادي دوسیې او پلانونو او راپورونو جوړلو او ترتیبولو تر سرلیک لاندې د پوهنتون علمي او اداري کادرونو ته علمي سیمینار وړاندې کړ.
یاد سیمینار د قرآن کریم د مبارکو ایاتونو په تلاوت سره پیل شو او د مستقبل پوهنتون علمي چارو مرستیال ښاغلی استاذ نجیب الله نصرت د کیفیت د تضمین او په تعلیمي او تحصیلي اداره کې د استاذانو د مسؤلیتونو ترڅنګ د انفرادي دوسیې ترتیب او منظمونو پلانونو د ارزښت اړوند علمي خبرې د سیمینار ګډونوالو ته وکړې.
ورپسې د مستقبل پوهنتون د تضمین د کیفیت آمر ښاغلي انجنیئر منظور نادرزي په پلان جوړونه، د راپورونو ترتیب، د استاذانو د بهبود او انفرادي پلانونو، په پلانونو کې د شته ستونزو او د هغوی د اصلاح او لا معیاري کولو په موضوع ګډونوالو ته په تفصیل سره سیمینار وړاندې کړ.
دغه غونډه د شرعیاتو پوهنځي استاذ نورالله توحیدي په دعا پای ته ورسېده.
د سيمينار موخې:
1. د استاذانو انفرادي دوسیې ترتیب او تنظیم لپاره واضحه کړنلاره وړاندې کول.
2. د تضمین کیفیت اړتیاوې او معیارونه روښانه کول.
3. د تدریسي او څېړنیزو فعالیتونو ثبت او ارزونه.
د سيمينار عمده ټکي:
1. د انفرادي دوسیې تعریف او ارزښت: د استاذانو مسلکي اسناد، تدریسي پلانونه، څېړنیز فعالیتونه، او نور اړین معلومات پکې شامل وي.
2. د دوسیې ترتیب او تنظیم اصول: د اسنادو سم مدیریت، د معلوماتو تنظیم، او د نړیوالو معیارونو مراعات.
3. د کیفیت تضمین رول: څنګه د استاذانو دوسیې د پوهنتون کیفیت ته وده ورکولی شي.
4. عملیاتي مراحل: د استاذانو لپاره مشخصې فورمې، چکلېسټونه، او د معلوماتو د داخلولو میتودونه.
5. د پوهنتون اداري همغږي: د تضمین کیفیت، تدریسي چارو، او بشري سرچینو ریاستونو همکاري.
په درنښت
د عامه اړیکو او نشراتو آمریت
