د ۱۴۰۳ لمریز کال پسرلني سمستر لپاره د کانکور ازموینه واخیستل شوه!
جمعه، ۴/۱۲/۱۴۰۲
مستقبل پوهنتون د ۱۴۰۳ لمریز کال پسرلني سمستر لپاره عمومي او اختصاصي کانکور ازموینه د لوړو زده کړو وزارت په استازیتوب د ازموينې د څارنې او ارزونې لپاره مؤظف هیئت استازو په حضور کې واخيستل شوه.
د مستقبل پوهنتون رئیس پوهندوی دوکتور شفیق الله امین ګډونوالو ته د ښه راغلاست وینا پرمهال له ګډونوالو مننه وکړه چې پر مستقبل يې باور کړی دی.
هغه زیاته کړه، چې محصل محوره او با کیفیته زده کړې ورته لومړیتوب لري او د زده کړیالانو بشپړ حقوق به ورته ورکوي.
د یادې ازموینې د بشپړ شفافیت په موخه د لوړو زده کړو وزارت او امنیتي ادارو په استازیتوب د راغلي هیئت او مستقبل پوهنتون مسئولينو له خوا د ازموینې د څو تنو ګډونوالو په شتون کې مهرلاک شوي صندوقونه خلاص او پوښتنپاڼې ګډونوالو ته توزیع شوې؛ چې ازموينه د پلان مطابق په ټاکلي وخت پای ته ورسېده.
بریالي ګډونوال به د ترلاسه شویو نمرو په اساس په شرعیاتو، حقوق او سیاسي علومو او انجنیري پوهنځیو کې د لیسانس په کچه لوړو زده کړو ته جذب شي.
د مستقبل پوهنتون د عامه اړیکو او نشراتو آمریت
